O salón de plenos da Casa Consistorial de Ribeira acollerá este xoves 26 de maio a presentación oficial da obra gañadora do oitavo Concurso de Novela Curta Cidade de Ribeira, a partir das 20.30 horas. Trátase de Lúa nova, da autora ferrolá Irene Montero.
O acto estará presidido polo alcalde Manuel Ruiz e contará tamén coas intervencións de Fran Alonso, director de Xerais, editora do libro; e da propia autora. Tamén estarán presentes diversos representantes do xurado.
A cita estará amenizada musicalmente cun trío formado por alumnos do conservatorio: Miguel González Maceiras ao piano, Lázaro Losada Borja ao saxofón e Claudia Dasilva Pérez ao violonchelo.
A entrada é libre e cada asistente será agasallado cun exemplar da novela.