O Concello de Ribeira informou de que a redacción do proxecto de expropiación dos terreos para o novo polígono industrial xa foi completada. Agora, a súa aprobación inicial será sometida á consideración dos grupos da Corporación na sesión ordinaria do pleno do mes de maio, programado para o vindeiro luns día 30 ás oito da tarde.
Segundo engadiron fontes do Consistorio, “deste xeito dáse outro paso máis na consecución desta área industrial destinada a ocupar un espazo de 258.000 metros cadrados na zona de Fontenla e Pedras Vermellas, na parroquia de Palmeira”.
O Concello tamén lembra que a empresa adxudicataria do proxecto foi Fernández Carballada y Asociados. De acordo cos traballos, a relación de propietarios suxeitos á expropiación recolle un total de 17 titulares, donos de 21 parcelas.
De recibir o visto bo da Corporación, será sometido a exposición pública por prazo dun mes para que as persoas interesadas formulen as observacións e reclamacións convenientes.
