Rianxo ía acoller estes días dous concertos de tributo ao compositor galego Carlos García López-Picos (Betanzos, 1922–Oleiros, 2009), do que se está a celebrar o centenario do seu nacemento. Tratábase de dúas actuacións programadas para os días 20 e 21 de maio no Auditorio Municipal de Rianxo.
O primeiro concerto programado, o do 20 de maio ás 21.00 horas, mantense na súa data. É unha actuación para violonchelo e piano que contará coa presenza da violonchelista Teresa Morales Diego e o pianista Javier Ares Espiño, que interpretarán partituras de Manuel de Falla, García-Picos, Isidro B. Maiztegui e Astor Piazolla.
O que si que é obxecto de cambios é o do 21 de maio (unha actuación para voz e piano coa soprano Susana de Lorenzo e o pianista Alejo de Lorenzo, que tiñan previsto ofrecer a súa versión de obras de obras de Marcial del Adalid Gurrea, Eugenia Osterberger Luard, Andrés Gaos Berea, García-Picos e Juan Durán Alonso). Esta cita musical adíase para nova data por causas alleas ao Concello de Rianxo.
O compositor
Compositor e director de coros galego-arxentino, Carlos López García-Picos, desenvolveu gran parte da súa actividade en Bos Aires, onde contactou coa intelectualidade galeguista. Na súa formación destaca unha estancia de varios anos en Francia, onde estudou na Schola Cantorum e no Conservatorio Nacional de París. Foi o principal impulsor, socio e membro de honra da Asociación Galega de Compositores e mantivo na capital arxentina un compromiso constante coa comunidade galega, reflectida en moitos aspectos da súa obra.
