A Marea Cidadá de Noia emitiu un comunicado crítico coa situación da Unidade de Saúde Mental no municipio. Segundo advirten, “a falta de persoal pon en perigo a situación de moitas persoas vulnerábeis, que xa están a ver agravados os seus problemas”. E engaden: “De acordo coa información aportada pola formación local, a falta de persoal psiquiátrico nos servizos sanitarios da vila estaría dificultando a intervención nun momento especialmente delicado”.
A Marea opina que malia tratarse dun servizo cada vez máis demandado, “non hai persoal de abondo para dar resposta a esta demanda”. De feito, indican, “tan só no último mes foron decenas as persoas que se queixaron da actual situación, denunciando as diferentes formas nas que esta seria carencia afecta gravemente as súas vidas”.
Dende A Marea entenden que “estas situacións de desamparo, malestar e en moitos casos angustia derívanse claramente de falta de persoal e de coordinación na Unidade de Saúde Mental, así como da falta de recursos públicos dedicados a apoiar iniciativas e asociacións orientadas ao coidado e a promoción da saúde mental”.
