Arredor de setecentos escolares de Educación Infantil e Primaria dos distintos centros educativos de Ribeira asistiron estes días (entre onte e hoxe), no Auditorio Municipal, á proxección da película Valentina, galardoada nos Premios Goya deste ano como mellor filme de animación.
O último pase, celebrado este mércores 6 de abril ao mediodía, contou coa participación da súa directora, Chelo Loureiro, para presentar esta creación audiovisual aos cativos asistentes. Con ela estiveron as edís Juana Brión e María Sampedro, que chegaron a retratarse coa autora no photocall disposto na entrada do Auditorio.
Valentina conta a historia dunha nena con síndrome de Down que persegue o soño de converterse en trapecista. Trátase da primeira película de animación protagonizada por unha persoa con esta afección.
A actividade forma parte do programa do Abril Mes dos Libros impulsado pola Concellería de Educación.
