Ribeira recupera os seus actos tradicionais de Semana Santa

A Semana Santa de Ribeira regresa este ano aos formatos e actividades tradicionais, entre as que se inclúen citas tan relevantes como as procesións do Paso e do Santo Enterro, ou o Sermón das 7 Palabras e Desencravo.

A axenda foi presentada este mediodía na Casa do Concello por parte do cura párroco de Santa Uxía, Alfonso Mera; a concelleira de Cultura María Sampedro; Puri Cores como presidenta da Asociación de Amas de Casa; e Carmen García en representación da Asociación Alfaia.

María Sampedro manifestou a súa ledicia por “poder programar as actividades con normalidade” e informou de que, ademais de colaborar na loxística, dende o Concello vaise volver exhibir ao aire libre a exitosa exposición creada por Lesmes Fotógrafos sobre esta festividade que se amosou o ano pasado. “Desta vez non será no adro da Igrexa senón noutro punto do centro urbano”, anunciou.

Alfonso Mera debullou o calendario de actos, que principiará ás 11.30 horas deste domingo coa Bendición de Ramos no Monumento para ir logo en procesión ata o adro da igrexa parroquial, onde ao mediodía celebrarase a Eucaristía. Entre o luns e o mércores santo terán lugar as visitas ás persoas maiores e enfermas, advertindo ao respecto que “hai xente que aínda ten medo de saír por mor do COVID”.

Xa o Xoves Santo ás 19 horas celebrarase a Santa Cea, ás 20.30 horas a Procesión do Paso e ás 22.30 a Hora Santa. No Venres Santo ás 11.30 haberá o Sermón do Encontro no adro da Igrexa; ás 19 horas a celebración da Paixón do Señor na Igrexa Parroquial; ás 20 horas o Sermón das 7 Palabras e Desencravo no adro da Igrexa; e por último ás 21 horas a Procesión do Santo Enterro. No Sábado Santo ás 22 horas terá lugar a Solemne Vixilia Pascual e no Domingo de Resurrección ás 12, a Misa Solemne de Pascua.

Puri Cores e Carmen García incidiron durante as súas intervencións na Procesión do Paso. Previamente á súa celebración, o xoves ás oito e media da tarde haberá senllos ensaios o martes e o mércores da semana que vén no Colexio O Grupo. Serán ás nove da noite.