Este sábado tivo lugar en Ribeira ‘Ambar na rúa’, unha feira de arte e artesanía na que as persoas artesás e artistas que asisten ós obradoiro ocupacionais da Asociación Ambar das persoas con diversidade funcional poñerán en valor o seu traballo a través de mostras en vivo, obradoiros colaborativos e venta de produtos solidarios elaborados por elas mesmas. Esta acción cumpre a premisa da entidade de ‘Impulsar vidas independentes na comunidade’ e é a primeira actividade conmemorativa do seu 40 aniversario.
Tivo lugar de 10:00h a 15:00h no paseo do Malecón, en Ribeira. Entre os postos atoparonse: unha demostración de artesanía en vivo, un obradoiro de encadernación para os máis pequenos, un obradoiro artístico colaborativo, un posto con información de servizos e proxectos, un posto de venta de produtos solidarios e un espazo para sentarse e conversar cas persoas artistas e artesás que levan a cabo esta actividade. Tamén contaron co concerto da artista local Lau Panicanela..
Persoas con valor fan produtos con valores
En Ambar elabóranse de maneira artesanal produtos únicos que poñen en valor o potencial das persoas, axudando a cambiar a percepción que se ten da diversidade funcional.
Tamén se promove a arte e artesanía inclusiva a través de actividades colectivas que mesturan artes plásticas, escénicas e artesanía co obxectivo de visibilizar o traballo artístico e artesanal e transmitir ó público mensaxes de interese social.
