O Auditorio de Rianxo vai acoller este mes de maio un Concerto Homenaxe ao escritor local Brea Segade. Será o día 7 a partir das 20.30 horas, na Sala Arcos Moldes. O tributo musical e literario virá da man de Manuel Tubío (composicións, guitarra e voz) e Carme Tubío (violonchelo).
O concerto consiste na estrea de 10 poemas musicados por Manuel Tubío e presentados nun pequeno formato de guitarra e voz con acompañamento de violonchelo para contribuír, en palabras dos dous músicos, “á recuperación e difusión da obra do poeta Xosé María Brea Segade (1904-1934)”.
O Concello engade que o núcleo do programa é unha escolma de sete poemas do propio Brea, que están precedidos por outros tres de escritores que tiveron algún tipo de vínculo co homenaxeado: os tamén rianxeiros Rafael Dieste, Faustino Rey Romero, e Xesús Santos. Ademais da interpretación musical, intervirán Xesús Santos e Xosé Ramón Brea con comentarios sobre a vida e obra do autor, e haberá unha proxección de fotografías do lalinense Ales Piñeiro.
A entrada é gratuíta e a reserva de localidades cómpre realizala a través da web municipal.
