Ribeira e Porto do Son van seguir colaborando en materia de emprego. Así o confirmaron este venres 8 de abril os alcaldes de Ribeira e Porto do Son, Manuel Ruiz e Luis Oujo, no transcurso da sinatura dun novo convenio de cooperación laboral. Este acordo senta as bases para a celebración dunha nova convocatoria, a oitava xa, do Obradoiro Tahume. Centrarase nas especialidades de cociña e de confección e montaxe de artes e aparellos. Unha vez aprobado e posto en marcha achegará contidos e recursos formativos, teóricos e prácticos, a vinte alumnos-traballadores durante un período de 12 meses.
Segundo explicaron, na especialidade de cociña (Operacións básicas de cociña e pastelería) está contemplada a participación de doce alumnos e alumnas de ambos concellos, tendo a Escola Municipal de Hostalería de Ribeira situada no segundo andar do Mercado a súa aula de formación: un lugar que xa deu cabida a outros dous obradoiros de emprego (O Pote I e O Pote II) se ben unicamente coa intervención de alumnos do municipio ribeirense.
En canto á confección e montaxe de artes e aparellos, prevese a participación de oito alumnos (tamén de ambos municipios) e a súa aula de formación estará situada en Porto do Son. Con esta especialidade, sinalaron Ruiz e Oujo, “pretendese incidir nunha ocupación que ten a día de hoxe unha alta demanda de traballo asociado coa flota pesqueira e está abrindo ademais outras saídas laborais vinculadas coa artesanía galega”.
