O Concello de Boiro fixo balance da actividade xerada a nivel local polo servizo Liña Verde, unha aplicación móbil a disposición dos municipios que permite mellorar o tempo de resposta e a operatividade ante todo tipo de avisos da cidadanía e mellorar a xestión das entidades locais. “A posta en funcionamento deste servizo permitiu facilitar á veciñanza a comunicación co Concello así como a resposta da administración para a súa resolución”, sinalaron fontes do Consistorio, engadindo que dende que comezou a empregarse este servizo puido darse solución a máis de 1.630 incidencias detectadas polos veciños e veciñas.
Aquelas máis notificadas son as relativas ao alumeado público; seguidas das de medio urbano, beirarrúas e mobiliario; auga e saneamento; ou limpeza viaria e recollida de lixo. Nos dous primeiros meses do ano 2022 presentáronse un total de 521 incidencias, o que supón unha media mensual de 260 notificacións.
“A incorporación deste servizo de xestión de incidencias, ademais e ter unha comunicación máis rápida coa cidadanía, permítenos tamén detectar cales son aqueles departamentos que teñen un maior volume de traballo e facer un reforzo do servizo para que os recursos estean correctamente distribuídos en función das necesidades”, afirmou o alcalde, José Ramón Romero, quen salientou a implicación da veciñanza neste servizo, que fixo posíbel coñecer as necesidades detectadas e darlles “solución máis axiña”.
Para empregar o servizo de xestión de incidencias Liña Verde so é preciso descargar de forma gratuíta a aplicación nun dispositivo móbil e rexistrar unha nova incidencia, indicando o lugar ou as coordenadas e incluso incorporar unha foto.
