Coa volta á normalidade trala crise da COVID, a actividade festiva e cultural da comarca retoma o seu pulso. Un exemplo é o San Marcos de Noia, cuxo programa xenérico foi presentado polo presidente da Asociación Pura Raza Cabalo Galego, Xacobe Pérez, e o concelleiro de Cultura, José Pérez, quen puxeron o foco (entre outras cousas) na Feira Cabalar, “un evento único” no que poderemos ver in situ os exemplares equinos máis destacados da nosa terra ou, tamén, participar na ruta xacobea- cabalar Portus Apostoli (terceira edición, en formato aberto para todos os seareiros dos cabalos).
A feira vén este ano con 4.000 euros en premios para distribuír nas súas diversas modalidades (case medio cento de categorías, incluída unha para nenas e nenos). O cartaz deste ano foi elaborado polo noiés David Fernández Fornís. A cita equina (organizada pola dita asociación) será o vindeiro 25 de abril, a xeito de culminación das festas de San Marcos que comezan o venres 22. A celebración, segundo fixo saber o edil de Cultura, virá cunha completa axenda de actividades, alén das estritamente relacionadas co mundo equino. Así, destacou a celebración dunha mostra de maquinaria agrícola (o 25), as verbenas amenizadas polas orquestras París de Noia, New York e Marbella ou os concertos de The Vacas (o día 22) e Dr. Queen (homenaxe a Queen). Tamén está prevista unha gran foliada que recupere o formato multitudinario previo á crise da COVID, cando chegaron a xuntarse arredor de 200 gaiteiros.
