O Grupo Municipal Socialista de Noia vén de rexistrar unha moción para o seu debate no pleno ordinario de abril na que se urxe á mellora e rehabilitación do entorno de A Pedrachán. Indican os socialistas que “actualmente, logo de varios anos sen ter ningún tipo de mantemento, existen varios elementos que están deteriorados e precisan de melloras ou rehabilitacións”.
Segundo fan saber, os accesos a iluminación atópanse danados, con luminarias subterráneas rotas que “son perigosas polo risco de caída que supón o seu estado actual”, indican, engadindo que tamén hai “paneis totalmente esnaquizados”. A isto súmanse as eivas do lavadoiro, que, segundo explican, ten os elementos para a recollida de augas moi deteriorados.
O voceiro dos socialistas Roberto Iglesias sinala que “o entorno da Pedrachán foi obxecto dun proceso de recuperación no ano 2009, baixo o mandato do alcalde socialista Rafael García Guerrero, que conseguiu converter o lugar nunha das contornas de Noia máis visitadas pola veciñanza e polos turistas, pola beleza e singularidade dos elementos que alí están situados, entre os que se atopan os muíños, o lavadoiro ou as canalizacións de auga, entre outros”.
Para “recuperar a contorna o antes posíbel” e “frear o deterioro”, o Grupo Socialista considera “urxente” que se habilite unha partida nos vindeiros orzamentos para esta zona, para a rehabilitación dos elementos en mal estado e a mellora da iluminación e acceso para garantir a seguridade dos mesmos.