O Ministerio de Ciencia convida ao Concello de Ribeira a moderar unha mesa de debate na Rede Innpulso

O Concello de Ribeira foi convidado polo Ministerio de Ciencia e Innovación a moderar unha mesa de debate no marco do último Encontro da Rede Innpulso (Rede Española de Cidades de Ciencia e Innovación) celebrado a semana pasada na localidade madrileña de Alcalá de Henares.

En concreto, o evento en cuestión foi o III Encontro de Secretarios e Interventores da Rede Innpulso, no que un técnico municipal ribeirense (Jorge González Mariño, adxunto ao interventor do Concello e Xefe da Área de Planificación, Orzamentos e Fondos Europeos) encargouse de moderar a mesa de debate titulada El uso estratégico de la contratación pública para fomentar la innovación, na que participaron representantes dos concellos de Ermua, Onda e Segovia.

Esta mesa tivo por obxecto expoñer as motivacións que poden impulsar aos Concellos a fomentar a Compra Pública Innovadora (CIPI) e poñer en valor a aposta polo coñecemento e a innovación como impulsores do crecemento das cidades.

Dende o Consistorio de Ribeira lembran que unha das actuacións en marcha dentro da EDUSI Máis Ribeira Atlántica (estratexia de desenvolvemento urbano co-financiada con fondos europeos FEDER) prevé a utilización da CPI para implementar solucións eficientes nalgúns pasos de peóns do municipio para mellorar a súa seguridade.

Dentro do programa do Encontro houbo unha segunda mesa de debate sobre o papel de secretarios e interventores na CPI das administracións locais que estivo moderara pola subdirectora xeral do Fomento da Innovación do Ministerio de Ciencia e Innovación, Amanda Gil.

Cómpre lembrar que o Concello de Ribeira forma parte dende o ano 2014 da Rede Innpulso, que está destinada a potenciar a colaboración dos concellos integrantes (63 a día de hoxe) para avanzar na definición e aplicación de políticas locais innovadoras.