O material promocional (merchandising) do Camiño de Santiago na nosa comarca (A Orixe) continúa na súa gráfica ascendente e segundo informou o Concello de Ribeira sumou novos puntos de venda na xeografía galega (con novos establecementos onde se pode adquirir) e mesmo noutros países. Así o fixeron saber o alcalde Manuel Ruiz e máis Puri Muñiz e Olga Blázquez, as responsábeis da empresa ribeirense Laguerzza (encargada de confeccionar os artigos integrantes do merchandising a partir dos deseños do pintor aguiñense Manuel Ayaso).
Segundo concretaron, amais do Mercado da Pedra en Vigo (primeiro punto de venta que se puxo en marcha, descontando a propia tenda de Laguerzza na avenida ribeirense de Rosalía de Castro), tamén se pode adquirir en varios establecementos da capital autonómica: no Seminario Maior, nunha tenda da Caldeirería (Mixa) e no restaurante Benboa, local que tamén o ten a disposición nas súas sedes de Corrubedo e A Coruña. Así mesmo, Puri e Olga fixeron saber que Laguerzza chegou a un acordo cun negocio do Cebreiro para poñer este material á venta tamén nesta localidade lucense, un punto de paso fundamental (e de encontro) dos fluxos de peregrinos que entran na xeografía galega.
Por certo que o material promocional de A Orixe tamén está a incrementar a súa presenza alén no ámbito internacional, xa que se atopa a disposición nas Casas de Galicia situadas en países como Estados Unidos, Suíza ou Alemaña.
Amais, o Concello de Ribeira contribuirá a súa divulgación utilizándoo como obsequio institucional.
Para rematar, o rexedor e as responsábeis de Laguerzza informaron de que a empresa de Ribeira xa elaborou un catálogo con todos os artigos que forman parte do merchandising de A Orixe, tales como gorras, polos, suadoiros, cortaventos, bolsas de tea, mochilas ou cuncas, todo en distintas cores.
