O CPI Eusebio Lorenzo Baleirón (Dodro) vai participar na final do Club de Debate logo de ter obtido a terceira mellor puntuación na primeira fase celebrada este martes 5 de abril en Negreira. O equipo do centro estivo arroupado polo alcalde de Dodro, Xabier Castro, o concelleiro de Educación, Abel Tarrío, o de Cultura, Xoán Xosé Vicente, as representantes da ANPA Tania Casal e Nuria Eiras e tamén por familias que quixeron apoiar ó alumnado do CPI e as mestras Ana Ledo e Margarita González. A final será o vindeiro 6 de maio en Pontevedra.
O Club de Debate é un proxecto para dinamización lingüística entre a mocidade organizado desde varios concellos. Ten como finalidades concretas e específicas “contribuír ao uso oral do galego entre a mocidade” e “ofrecer recursos para a práctica de habilidades comunicativas e de relación interpersoal á vez que promove a reflexión e o intercambio de opinións”.