A semana pasada os operarios do servizo de obras do Concello de Noia levaron a cabo traballos diversos de limpeza no tellado dun dos grandes tesouros patrimoniais da vila: a Igrexa de Santa Maria A Nova.
Amais de limpar de herbas e outros elementos a cuberta, os operarios procederon a renovar varios elementos danados no teito do templo (por exemplo tellas e estruturas de madeira) e do propio muro do cemiterio, que presentaba desperfectos en varios dos seus recantos pola acción dos elementos climáticos, principalmente.
A Igrexa de Santa María a Nova é un dos monumentos relixiosos e históricos máis sobranceiros da vila de Noia. Trátase dunha igrexa construída en 1327 sobre outra máis antiga (do século XII), no centro do cemiterio histórico da cidade, e posúe unha mostra singular de laudas sepulcrais que datan dos séculos XIV ó XIX. Foi declarada monumento histórico artístico en 1973, estando actualmente dedicada a Museo (fonte: Galipedia).
