A Concellería de Cultura do Concello de Boiro vai inaugurar unha mostra itinerante sobre ilustración o vindeiro luns día 4 ás 19.00 horas na Casa da Cultura de Boiro. As pezas que se expoñen foron realizadas polos nenos e nenas dos centos de ensino do municipio ao abeiro duns obradoiros de ilustración impartidos por Rodrigo Chao.
O obxectivo destas actividades, que se impartiron en todos os centros de Primaria e Secundaria do municipio, foi dar a coñecer ao alumnado o proceso creativo na elaboración dunha ilustración e incentivar o interese na lectura e asistencia ás bibliotecas. “Con eles os nenos e nenas puideron aprender a importancia do bosquexo, técnicas sinxelas de debuxo, composición, acabados…”, informou o Concello de Boiro, salientando que os traballos que agora se van expoñer son interpretacións artísticas a través de ilustracións do alumnado baseadas en libros.
A concelleira de Cultura, María Outeiral, asistirá o vindeiro luns ás 19.00 horas á inauguración da exposición que estará durante dúas semanas na Casa da Cultura de Boiro e que será itinerante polos demais centos municipais.
