A portavoz de Pesca do BNG, Rosana Pérez criticou este xoves 7 de abril a posición do Goberno galego ante as “graves dificultades” do sector pesqueiro polas consecuencias da suba de prezos e a inflación. A parlamentaria da Pobra propuxo unha batería de iniciativas encamiñadas a “manter o emprego e a actividade”.
A deputada do BNG cualificou de “insuficientes as medidas” do Goberno do Estado e criticou á Xunta por “non ter reaccionado” e “seguir sen reaccionar” ante unha situación que, segundo dixo, “pon na picota a un sector que contribúe de maneira esencial ao PIB e o emprego de miles de persoas de maneira directa e indirecta”.
Na súa intervención, a nacionalista insistiu nas dificultades económicas do sector e considerou que as medidas do Goberno galego limítanse a “solicitar medidas” do Executivo español. En opinión de Pérez, “se o Goberno do Estado durante un ano mirou para outro lado, a Xunta empezou a actuar o 13 de marzo”. Fíxoo ademais, engadiu, “ignorando completamente a problemática do sector pesqueiro galego” e “sendo incapaz de axilizar as axudas concedidas”.
A deputada lamentou que o partido maioritario vetara o conxunto de medidas entres as que destacou: demandar ao Goberno español a “rebaixa dos produtos do mar ao tipo superreducido do 4% de forma permanente como recomenda a OMS, reducir a imposición sobre hidrocarburos até que se estabilice a inflación non entorno do 2%, aprobar axudas temporais polo incremento dos custes de produción para asegurar a viabilidade do sector, paralizar as reformas europeas e estatais dirixidas a eliminar as bonificacións do combustible pesqueiro, axudas polos amarres da flota e bonificar as taxas portuarias por servizos administrativos, profesionais e por utilización privativa, mentres se manteña a excepcionalidade da actual situación”.
