O Concello de Ribeira confirmou que vai organizar a novena edición do Xuño da Cultura e as Artes logo de dous anos de interrupción pola pandemia. Trátase dunha iniciativa xurdida en 2011 co obxecto de “mostrar ao longo dun mes todo o traballo que o tecido social do municipio realiza, poñendo en valor o seu labor e amosándoo nas rúas a través de diversas e variadas actividades culturais de todas as disciplinas artísticas (música, danza, literatura, fotografía, sociedade, audiovisual, arte dramática, artesanía, etc)”.
A concelleira de Cultura, María Sampedro, remitiu un escrito ás distintas asociacións e colectivos que adoitan participar sinalándolles a intención de retomar este programa de actividades. “A actual situación sanitaria obríganos a ser cautelosos pero tamén nos permite ir amodiño retomando a actividade e por iso cremos que é o momento para volver a apostar por este programa, sempre respectando a normativa en vigor, con eventos de pequeno e mediano formato e aforos reducidos, aplicando o dispositivo de prevención implementado tanto nas instalacións culturais como para aquelas que se desenvolvan no exterior”, sinalou.
Segundo confirmou, a Concellería de Cultura coordinará todas as accións do tecido social e das áreas municipais, e realizará tamén eventos propios.
Tamén engadiu que as asociacións, centros educativos e institucións que se sumen a este programa “disporán do apoio técnico por parte do Concello, para facilitar o equipamento e infraestrutura que sexa preciso dentro da dispoñibilidade da área”.
Aquelas entidades que se queiran sumar deben poñerse en contacto coa Concellería de Cultura ata o 22 de maio. Unha vez finalizado este prazo non se admitirá ningunha proposta. Para confirmar a participación ou solicitar información cómpre dirixirse á Concellería de Cultura, de luns a venres de 10:00 a 14:00 horas (Centro Cultural Lustres Rivas, R/ Manuel Lustres Rivas, 20, 22 andar), no teléfono 981 835 650 ou no correo culturaefestexos@ribeira.gal.
