Co obxectivo de reivindicar e referenciar os tesouros do concello, con vistas ao turismo pero tamén co foco posto nos residentes, a Concellería de Cultura e Patrimonio de Dodro vén de levar a cabo a instalación de sete novos monólitos de información en outros tantos sitios de relevancia patrimonial no termo municipal (por exemplo o Valo de Manselle, a Capela do Santo Anxo da Guarda, o Pazo de Lestrobe, o Pazo de Tarrío ou o Pozo do Conxeiro).
Con esta intervención quedan sinalizados os principais bens do patrimonio cultural do concello, igrexas, capelas, construcións civís, cruceiros, hórreos etc. e dende o Consistorio manifestan que é a súa intención seguir no futuro con outros elementos significativos.
