O Concello de Noia compartiu o programa completo de actividades para O San Marcos, que se celebra a fin de semana de abril comprendida entre o venres 22 e o luns 25, incluíndo eventos tan relevantes como a gran Feira Cabalar ou a Ruta Cabalar Portus Apostoli, ademais dunha completa axenda de actuacións musicais.
Esta edición da festividade, que supón a volta dos chiringuitos do San Marcos, arrincará o venres 22 coas bombas de palenque (ás 20.00 horas) e as actuacións de Cheruma (en formato ruada, a partir das 20h) e a Orquestra New York, ás 22.00 na Alameda, seguido da actuación de De Vacas na praza do Curro (ás 22.30h).
Ao día seguinte, logo da celebración da Ruta Cabalar (a partir das 11.00 horas) e dos xogos populares para a rapazada no Campo da Feira (a partir do mediodía e a partir das 17.00 horas), será a quenda da Orquestra Compostela e La Ola ADN (na Alameda, a partir das 22h) e de Boomers e Dr. Queen (no Tapal a partir das 22.15).
O domingo 24 de abril, despois das bombas, as ruadas e a quinta Foliada San Marcos (ás 11.30h), actuarán, pola tarde, Ailá no Tapal e a Orquestra París de Noia na Alameda.
O luns a xornada comezará no paseo de San Lázaro coa Feira Cabalar e a exposición de maquinaria agrícola. Completarase cunha ruada a cargo de Os Salgueiriños. Pola noite, ás 21h, actuará na Alameda a Orquestra Marbella.
