Chega a Rianxo O porco de pé (Excéntricas) baixo a dirección de Pepe Sendón e Quico Cadaval

21 Abril 2022

A compañía Excéntricas vai representar en Rianxo o seu espectáculo O porco de pé, baseado na inmortal obra do ourensán Vicente Risco. Será o vindeiro 30 de abril, a partir das 21.00 horas, no Auditorio Municipal. Esta adaptación teatral da novela de Risco foi realizada por dous sobranceiros autores da nosa comarca: Pepe Sendón (Lira, Carnota, 1964) baixo a dirección de Quico Cadaval (Carreira, Ribeira, 1960).

A entrada xeral ten un custe de 10 € na billeteira do Auditorio o propio día da función. Inclúese un desconto cun custe de 5 € reservando previamente no Whastsapp (no teléfono 618 752 105) ou no correo-e ruben.excentricas@gmail.com. A representación está organizada por Producións Excéntricas coa colaboración, entre outras entidades, do Concello de Rianxo.

Quen queira afondar nos detalles da versión pode facelo a través da web de Excéntricas.

A obra (versión Excéntricas)

O Porco, o animal totémico dos cocidos e dos entroidos, toma os teatros para demostrar a sua superioridade sobre os seres humanos. O que presenta Excéntricas é un teatro de barracón, aquel que, na infancia, nos fascinaba e nos asustaba a partes iguais. Un farol mortizo, un chan de serraduras, unha cortina vermella e, de súpeto, aparece o porco en elegante pose de equilibrista a sosterse sobre os pés, a finxirse un ser humano con tanta graza, que resulta imposíbel distinguilo.

Vai para cen anos, Vicente Risco detectou unha nutrida presenza porcina vestida con elegantes abrigos e chapeus a confundirse cos propios burgueses. A divertidísima sátira do ourensán, a medio camiño entre o circo, o barracón, os fantoches e o cabaré, ten hoxe mais vixencia que nunca. Nesta viaxe á fascinante década do 20 do século XX, pasarán como nunha lanterna máxica, anarquistas, esportistas, agraristas, proxenetistas, golpistas, vangardistas, caciquistas, futuristas, pasadistas e presentistas.

Para dar vida á galería zoolóxica cóntase con tres fenómenos: Patricia Vázquez, Victor Mosqueira e Evaristo Calvo. Na plástica, o fantástico Carlos Alonso, no mundo sonoro, o ventrílocuo Piti Sanz, na luz, o acróbata Octavio Mas, e na dramaturxia a besta das dúas cabezas: Pepe Sendón e Quico Cadaval.

Outros artigos

Publicidade

Revista en papel

Opinión

“Hacia la España federal”. Xosé Perozo

“Hacia la España federal”. Xosé Perozo

Si se cumplen las predicciones demoscópicas, el próximo domingo EH Bildu ganará las elecciones en el País Vasco, superando por primera vez al PNV en escaños y en votos. El fenómeno de crecimiento abertzale está rasgando las vestiduras de muchos politólogos y...