O Concello de Boiro inaugurou esta mañá un novo tramo de carril bici que discorre pola rúa Salvador Allende e conecta o paseo marítimo co centro urbano. A concelleira de Deportes, Dores Torrado, estivo acompañada polo polo presidente do Club Ciclista Barbanza, Ricardo Riveiro, e o presidente da
Federación Galega de Ciclismo, Juan Carlos Muñiz, e a rapazada do Club que realizou tamén esta mañá a presentación para a tempada 2022.
O novo tramo de carril bici que se vén de realizar, de 420 metros lineais, conecta o xa existente que percorre o paseo marítimo de Barraña co núcleo urbano pola rúa Salvador Allende. Ademais levouse a cabo a reparación de varios tramos deteriorados no paseo existente. “O obxectivo do Concello é
mellorar os servizos e seguir aumentando a superficie de carril bici para conectar os diversos núcleos de poboación e favorecer a mobilidade sostible”, afirmou a concelleira.
Logo da inauguración cun percorrido polo novo tramo de carril bici, o Club Ciclista Barbanza realizou a presentación do seu equipo para a tempada 2022 no auditorio da Cachada, na que interviron o presidente do club, Ricardo Riveiro; e o presidente da Federación Galega de Ciclismo, Juan Carlos Muñiz.
