A Mesa do Parlamento vén de admitir unha Iniciativa Popular non de Lei presentada pola Marea Cidadá de Noia na que se solicitan “melloras nos servizos sanitarios que o SERGAS presta no concello”. A dita agrupación manterá aberta ao longo destas semanas unha recollida de sinaturas para acadar o mínimo de 3.000 apoios que o Parlamento solicita unha vez aceptada a Iniciativa por parte da Mesa do Parlamento.
En dita Iniciativa, a Marea di que os servizos sanitarios noieses atópanse “nunha mala situación” e que ano tras ano “colápsanse nas etapas do verán”. Dende a formación local demandan “unha mellor previsión nas necesidades do centro sanitario, e que se conteste con reforzos nos momentos de verán, cando a demanda é maior”.
A Iniciativa tamén reserva un espazo para solicitar que se inicie a planificación da construción dun novo Centro de Saúde de Noia, “agora que tras 7 anos de peticións o Concello mercou un terreo específico para dita edificación”.