O presidente da Deputación, Valentín González Formoso, e o alcalde de Noia, Santiago Freire, asinaron este 22 de abril un convenio de colaboración para financiar o proxecto de seguridade viaria na rúa Coruña. A actuación, que está valorada en 84.527,05 euros dos que a Deputación aportará 67.621,64 euros, o 80% do orzamento, permitirá mellorar a seguridade de vehículos e peóns “nunha rúa interior do casco urbano de Noia que é moi utilizada xa que, por unha banda, conta cunha elevada actividade comercial e, pola outra, une as vías AC-550 e AC-311”, sinalaron.
Os traballos a levar a cabo incluirán, ademais da renovación do firme e da reposición da sinalización horizontal que se atopa moi deteriorada, a recolocación de dous pasos de peóns que “pola pouca visibilidade que teñen, ofrecen certo risco para o paso das persoas maiores”, explicaron Formoso e máis Freire, engadindo que noutros tres lugares de tránsito peonil axustaranse os pasos de peóns co obxectivo de mellorar a súa accesibilidade. Amais, “debido a que en obras anteriores foise subindo a cota do firme sen modificarse a das beirarrúas”, realizarase unha escarificación da plataforma para que os itinerarios dos peóns gañen en altura.
