Ao abeiro do Premio Raíña Lupa de Literatura Infantil e Xuvenil, a Deputación da Coruña puxo en marcha unha iniciativa para render homenaxe aos libros e acrecentar, principalmente na poboación máis nova, a chama da paixón literaria. Estamos a falar do Club de Lectura Raíña Lupa, un programa de encontros informais arredor dos libros que bota a andar enchendo de recomendacións, suxestións e propostas o último venres deste mes de abril. A iniciativa nace sen ningún tipo de atadura nin etiqueta, co obxectivo de facer partícipes do amor pola literatura infantil e xuvenil a persoas de todas as idades.
Esta iniciativa está coordinada pola gañadora da última edición do Premio Raíña Lupa, Andrea Maceiras, e celebrarase na Sala César Antonio Molina da Biblioteca Provincial da Coruña, ás 18h do último venres dos meses de abril, maio, setembro, outubro e novembro.
O venres 29 de abril, será o escritor Antonio Manuel Fraga o encargado de inaugurar esta rede de encontros co público lector.
Na mañá deste 11 de abril, a coordinadora, Andrea Maceiras, e o autor Antonio Manuel Fraga visitaron a Biblioteca provincial na que terán lugar as sesións. Nos seguintes encontros participaran Érica Esmorís, Berta Dávila, Ledicia Costas, Manuel Rivas e a propia Andrea Maceiras.
Para participar no Club da Raíña Lupa será necesario inscribirse previamente a través de correo electrónico. O prazo de inscrición para integrarnos nas fileiras do club abrirase o luns 18 de abril, día no que se fará público o enderezo electrónico de inscrición. O número de prazas estará limitado a 20 persoas e poderá participar tanto o público máis novo como calquera persoa adulta -nais, pais, irmáns, docentes, bibliotecarias- que desexe compartir experiencia lectora cos máis novos e novas.
Calendario de lecturas e encontros
· 29 de abril: Antonio Manuel Fraga con Santoamaro
· 27 de maio: Érica Esmorís con Patio de luces
· 30 de setembro: Berta Dávila con Un elefante no cuarto de estar
· 28 de outubro: Ledicia Costas con O neno de lume e Manuel Rivas con A nena lectora
· 25 de novembro: Andrea Maceiras con Que se me pare o corazón se te esquezo