A Deputación da Coruña, a través do seu Plan Único, anunciou que vai destinar 630.000 euros para financiar tres obras de mellora da seguridade viaria, equipamentos e servizos en diferentes puntos do concello de Boiro.
Unha destas actuacións será a execución de beirarrúas e servizos desde Cespón a Quinteiro (beira este), na estrada DP-1106, dende o PK 4,700 ao PK 6,200. Os traballos consistirán “na creación dunha beirarrúa de 1,5 metros de ancho e a instalación de rede separativa de pluviais e fecais, de abastecemento e nova iluminación pública”.
O segundo proxecto que está a licitación é o de mellora da eficiencia enerxética no CEIP Santa María do Castro. O obxectivo é “realizar unha fachada térmica tipo SATE para eliminar pontes térmicas, humidades por condensación e colonizacións por fungos, obtendo unhas axeitadas condicións de confort interior e salubridade cun mínimo consumo enerxético”.
Por último, o Plan Único financiará a mellora de pavimentos e servizos nos lugares de Carragueiros, Currillo, A Mina e Loimar. En total, mellorarase o firme en 2.432 metros de vía e, no caso do lugar de Currillo, aproveitarase para executar unha rede separativa de pluviais que “garanta que as augas de choiva non deterioren a estrada e que non acaben filtrando na rede de fecais existente”, sinalou a Deputación.
As tres obras están en fase de licitación pública. O prazo para a presentación de ofertas na Plataforma de Contratación do Estado remata o 28 de abril.
