Este sábado 12 de marzo temos unha cita teatral de primeira liña na Casa da Cultura de Boiro. Trátase de A Carreta Pantasma, un espectáculo para público adulto da escritora e narradora oral Paula Carballeira baseado no filme homónimo de Victor Sjöström. As entradas pódense adquirir o mesmo día da función a partir das 20.00 horas.
A Carreta Pantasma, de 70 minutos de duración, é un espectáculo no que se afonda nos límites entre a narración oral e o teatro, en palabras da produtora Urdime “un exercicio de sinxeleza ao levar á escena o poder da palabra amplificado con elementos de significación escénica, unha exploración sobre a emoción a través dos mínimos artificios”. Como dixemos, a peza está baseado na lenda popular sueca que deu orixe ao relato de Selma Lagerloff, a primeira muller en recibir un Nobel de Literatura e que o director de cinema nado en Silbodal, Victor Sjöstrom, levaría ás pantallas no ano 1921.
Ficha artística
Interpretación e dramaturxia: Paula Carballeira
Dirección escénica e deseño de iluminación: Chiqui Pereira
Audiovisuais e espazo escénico: Miriam Rodríguez
Espazo sonoro: Nacho Sanz
Vestiario: Mercedes Torres
Deseño gráfico: Nadina Gráfica
