Os socialistas din que a “baixa execución” da Xunta derivará nunha perda de fondos europeos para o mar e a pesca

A voceira de Pesca do Grupo Parlamentario Socialista, Patricia Otero, alertou este xoves 3 de marzo “da posibilidade de que se perda unha gran cantidade de fondos europeos para a pesca e o sector do mar pola lentitude e a falta de eficacia da Xunta á hora de executalos”.

Otero expresou a súa preocupación polo que cualifica “un risco de perda de fondos” na Comisión de Pesca do Parlamento, tras coñecer que aínda quedan por executar 171,50 millóns de euros dos 371,02 de euros que se lle asignaron a Galicia no FEMP. Isto, dixo, supón “menos do 50 por cento”, en concreto o 42,37 por cento, nunha comunidade “na que o sector é estratéxico e fundamental” e ademais “cando tan so queda pouco máis ano e medio para culminar a súa xestión”.

Na súa pregunta ao Goberno galego, Patricia Otero criticou “a lentitude”, dixo, “que sufriu a execución destes fondos no ano pasado”, algo para o que “non poden usar como pretexto a complexa situación derivada da pandemia”. Nesta liña explicou que “en 2020, nos peores momentos da crise da COVID, executáronse 62,9 millóns de euros, mentres que en 2021 a cantidade foi menor e só chegou aos 47,8”.

Otero tamén lamentou o que cualifica de “falta de resultados” derivada da posta en marcha dunha subdirección xeral específica para axilizar e optimizar a xestión destes cartos. “Tiñamos postas moitas esperanzas en que se notase a posta en marcha deste organismo”, sinalou Otero, “pero o certo é que os datos non o demostran”. Segundo dixo, “dende maio do ano pasado só se executaron 82,50 millóns de euros”, o que evidencia, engadiu, “que a entidade non está a facer que se cumpra o obxectivo que se marcou cando se creou porque non foi quen de darlle un pulo ao sector”.

Neste contexto, Patricia Otero instou á Xunta a “traballar con feitos a prol dos profesionais do mar, executando unha maior cantidade dos fondos FEMP” porque “existe a posibilidade de que se perdan moitos millóns de euros e que acaben por non beneficiar ao sector”.