O Grupo Municipal Socialista de Noia anunciou que levará ao pleno ordinario de marzo unha moción solicitando ao Goberno municipal o proxecto técnico para a creación da vía Barquiña-Orro. Esta moción materialízase despois de que o voceiro Roberto Iglesias, e a concelleira e deputada provincial Sandra González, mantiveran unha reunión coa Asociación de Veciños da Barquiña para escoitar as súas queixas polas discriminacións das que din ser obxecto e recibir unha serie de peticións para dar traslado ao Goberno municipal. O dito proxecto técnico da vía está recollido no PXOM aprobado en 2016 e actualmente atópase en tramitación, segundo lembran os socialistas.
O voceiro Socialista Roberto Iglesias incide en que “a Barquiña é un dos núcleos máis poboados que ten o concello e o actual Goberno ten completamente abandonado, non levando a cabo as solicitudes que os veciños veñen demandando dende hai anos”. Por esta razón, sinala, “solicitamos que se leve a cabo este proxecto para non agardar pola aprobación do PXOM, e ir axilizando prazos para que esta vía de comunicación sexa unha realidade nun prazo razoábel, facendo as xestións precisas e tendo en conta a opinión dos afectados”.
Amais, o grupo do PSOE tamén recoñece que se comprometeu para dar traslado por escrito a varios dos asuntos que lle solicitaron dende a asociación de veciños, como o estado da vía que conecta co Río do Porto, a falla de contedores de lixo para poder reciclar axeitadamente e as eivas de mantemento en Punta Paralada. A veciñanza tamén lle trasladou á agrupación o seu interese por como se atopan as xestións realizadas con outras administracións para a retirada das tubaxes de fibrocemento.
