Os maiores de Lousame aprenden a manexar o novo caixeiro automático instalado no Consistorio

Lousame xa ten novo caixeiro automático a disposición da veciñanza. Foi grazas á xestión de Abanca e a Xunta, que impulsaron unha iniciativa para dotar deste servizo a aqueles concellos que non conten xa con sucursal. No caso de Lousame, contaron coa plena colaboración do Concello, quen, de feito, habilitou a fachada do Consistorio para a instalación de equipamento en Portobravo.

Formación

O Concello informou de que medio cento de veciños e veciñas de Lousame, maiores de sesenta anos, participaron este xoves 24 en dúas sesións formativas para aprender a manexar o caixeiro automático que a semana pasada instalou Abanca en Portobravo, na fachada da Casa do Concello. Esta sesión abeirouse ao plan de formación da entidade vencellado á instalación destes caixeiros.

O tenente de alcaldesa de Lousame, Ramón Martínez, asistiu ás sesións e destacou que “a instalación dun caixeiro automático ou dunha oficina en Lousame é algo polo que este grupo de Goberno traballou moitos anos. Por iso é de celebrar esta iniciativa da Xunta de Galicia que permitirá que os veciños e veciñas de Lousame non teñan que desprazárense a outros concellos para facer xestións como retirar ou ingresar cartos, actualizar cartillas ou pagar os seus recibos”.

Neste sentido, Ramón Martínez agradeceu que tanto a Xunta como Abanca “tivera a ben ofrecer estes cursos de formación básica en banca electrónica pois a nosa experiencia cos maiores e coas novas tecnoloxías está a ser moi positiva. Así o demostran os distintos cursos de manexo de móbil e de Internet que temos celebrado e que fan que moitos dos nosos maiores xa saiban como solicitar cita no médico ou consultar a prensa. Agora, xa saben como acceder aos servizos da banca electrónica”.

Así, unha formadora de Abanca explicou (con imaxes e recursos prácticos) durante dúas horas aos maiores de Lousame como funciona o caixeiro e cales son as operacións máis habituais que se poden realizar. A formadora fixo fincapé en que as xestións se poden facer con confianza e con todas as garantías de seguridade, sempre que se sigan as recomendacións básicas de seguridade.