Este 8 de marzo, coincidindo co “Día Internacional da Muller” a Televisión de Galicia fai unha programación especial en horario de prime time no que se proxectará a versión galega da película “A Illa das mentiras”, rodada en varios puntos da comarca Aguiño, Muros, Cambados, Sálvora…etc.
A traxedia do Santa Isabel e as vida das mulleres de Sálvora tralo afundimento do vapor-correo Santa Isabel, son os protagonistas dunha historia que fai unha interpretación libre do naufraxio, no que faleceron 213 persoas, e da vida dos aldeáns desde aquel 2 de xaneiro de 1921.
Dirixida por Paula Cons, a película conta cun elenco no que figuran, entre outros, Nerea Barros, Aitor Luna, Darío Grandinetti, Victoria Teijeiro e Ana Oca. Ademais, obtivo varias distincións nos Mestre Mateo.
Despois da película a canle autonómica proxectará o capitulo da serie “Buscadores de naufraxios, O Santa Isabel”, no que se conta a historia do naufraxio e permitirá coñecer como están os restos do pecio na actualidade, declarado o 2 de xaneiro de 2021 como Ben de Interese Cultural.
