O rianxeiro Anxo Muíños presenta “Xinque!” na súa terra o vindeiro venres 25

O rianxeiro Anxo Muíños vai presentar o seu novo libro, Xinque!, no salón de actos do Auditorio de Rianxo. Será o vindeiro venres 25 de marzo ás 19.00 horas.

Na presentación ademais do autor estarán presentes Adolfo Muíños (alcalde de Rianxo), Rafa Xaneiro (corrector), Roberto Abuín (editor) e Xosé Carou (autor do epílogo)

A reserva pode facerse na web municipal, a través da sección de reservas.​​​​

A reserva será efectiva cando se confirme dende o auditorio (non é inmediata).

O autor e a obra

Anxo Gómez Figueira, coñecido como Anxo Muíños (Taragoña, Rianxo, 1966), é un escritor moi envorcado na cultura mariña e nas historias e escenarios dende os que reivindicar a defensa do noso medio. Xinque!, editada polo selo da nosa comarca Toxosoutos, é a segunda parte dunha saga que arrincou con O alén dos barqueiros. Segundo explicou o autor nunha entrevista con Nós Diario, “se en O alén dos barqueiros o protagonista era o antropólogo sueco Ingemar Westtertorma, que no marco da II Guerra Mundial viaxaba desde a súa terra até Portugal, pasando por diferentes países, entre eles a Galiza, en Xinque! a protagonista, Fanes, é a filla daquel antropólogo; unha rapaza comunista que percorre diferentes países até rematar en California, en pleno auxe do movemento hippie”. Esta segunda parte abrangue os anos entre 1965 e 1969 e remata cando militantes do movemento indio de Estados Unidos ocupan a prisión de Alcatraz, en San Francisco.