O Mercado de Ribeira acolle unha mostra que reivindica as redeiras e as posibilidades do seu oficio

O Mercado Municipal de Ribeira inaugurou unha mostra artístico-reivindicativa con motivo do Día Internacional da Muller, este martes 8 de marzo. Trátase da exposición Enredadas, a través da cal exhíbese o traballo profesional e artístico desenvolvido polas redeiras artesás da nosa terra. Trátase dunha iniciativa que vai alén dos elementos que fundamentan o traballo tradicional deste colectivo, abrindo oportunidades empresariais e expresivas para o seu oficio (nos ámbitos da moda, a decoración e os complementos).

Ata o próximo 17 de marzo e dentro dos actos organizados polo Día Internacional da Muller, o primeiro andar do mercado acolle unha exposición na que, utilizando o soporte fotográfico, os visitantes poden contemplar o resultado do proxecto Enredadas: unha iniciativa promovida dende 2012 pola Xunta a través das Consellerías de Economía, Empresa e Innovación e da Consellería do Mar co obxectivo de “diversificar o traballo das redeiras artesás galegas”.

A mostra foi visitada polo director xeral de Comercio e Consumo da Xunta, Manuel Heredia, e pola directora xeral de Desenvolvemento Pesqueiro, Susana Rodríguez Carballo, que estiveron acompañados polo alcalde Manuel Ruiz, as concelleiras Ana Barreiro e María Sampedro.

Tamén estivo Elena Fabeiro, xerente da Fundación Artesanía de Galicia, que é a institución organizadora da exposición.

O alcalde lembrou que o Mercado Municipal de Ribeira albergara na primavera do 2016, aos poucos meses de abrir esta nova instalación, un workshop enmarcado neste proxecto e que estivo dirixido á produción de mobiliario por parte das redeiras participantes.

Enredadas pode ser visitada de luns a sábado, de 10 a 14 horas e de 18 a 21 horas.