O Concello de Boiro vén de executar obras de pavimentado en Pomar do Rio, unhas actuacións que segundo fontes do Consistorio completan o asfaltado de camiños rurais a parcelas agrícolas que se realiza mediante as axudas do Plan de mellora de camiños municipais de acceso a parcelas agrícolas 2021-2022 e que concede a Axencia Galega de Desenvolvemento Rural (AGADER).
En concreto, a actuación que se levou a cabo en Pomar do Rio contempla o pavimentado dun tramo de 351 metros lineais de 3.5 metros de ancho e completa as actuacións levadas a cabo en Bermo, onde se actuou en dúas vías. O importe total das actuacións ascende a 49.523,57 euros, coas que se actuou en tres estradas rurais que estaban nun estado deficiente.
Como dixemos as actuacións realizáronse mediante unha liña de axudas da Axencia Galega de Desenvolvemento Rural (AGADER), correspondente ao Plan de mellora de camiños municipais de acceso a parcelas agrícolas co obxectivo de facilitar o seu paso e tamén mellorar a accesibilidade e interrelación entre pequenos núcleos do rural.
