O Boiro Voleibol garante a sustentabilidade do proxecto a pesar de que arrastra un déficit desde a campaña 2020-2021

M. Alvarez.- O Boiro Voleibol celebrou onte á noite unha Asemblea Xeral Extraordinaria na que se deu conta da actualidade do club. A orde do día contaba con varios puntos, sobre todo referentes á actualidade económica da entidade. Os socios apoiaron a xestión da actual xunta directiva, que se puxo á fronte o pasado mes de setembro, sen ningún voto en contra.
O último punto da orde do día versaba sobre un informe económico das tempadas 2020-2021 e 2021-2022. O pasado verán, antes de que Emilio Palacio, presidente do Boiro Voleibol, e o seu equipo directivo puxésense á fronte do club, o déficit ascendía a 231.777,48 euros. Ademais, no momento da toma de posesión xa se pechou o orzamento para a presente tempada, que rolda os 330.000 euros. O mandatario dos boirenses explicou que “durante estes meses, traballamos para normalizar a situación económica. Debido á débeda acumulada, houbo algún momento de tensión en tesourería. Pero o futuro da entidade non está comprometido, porque buscamos a sustentabilidade e estamos dispostos a axustar o proxecto deportivo para garantir a viabilidade vindeira”.
Sobre o punto que facía referencia ás posibles renuncias dos equipos do club para tomar parte nas citas deportivas vindeiras ( play offs, campionatos de España…), a xunta directiva explicou que, na actualidade, non existe un risco “a curto prazo”. Con todo, advertiron que a falta de liquidez polo atraso na cobranza dalgunhas subvencións podería desembocar nese tipo de renuncias.
Os socios preguntaron á directiva sobre o comunicado que o Concello de Boiro fixo público a pasada fin de semana, no que se facía referencia á actualidade económica do club. Neste sentido, Emilio Palacio manifestou que “foi un comunicado emitido polo Concello do que non me corresponde falar. O único que podo dicir é que, en conversacións posteriores, o Concello deunos a súa palabra de que cumprirá esta primavera cos seus compromisos adquiridos. Unha vez que recibamos as subvencións, as contas estarán saneadas”.
Outro dos puntos da orde do día foi a proposta de expulsión dun socio por falta moi grave.
Acerca deste punto, a directiva afirmou que “se abriu expediente a un socio por unha falta moi grave e o proceso segue o seu curso”.