O deputado do BNG, Néstor Rego, vén de rexistrar iniciativas con propostas de medidas urxentes que ao xuízo da agrupación “debe adoptar o Goberno do Estado para paliar a crise actual do sector pesqueiro e minimizar seu o impacto”. En concreto, reclama “estabelecer unha rebaixa da imposición sobre os hidrocarburos, activar as axudas de minimis e compensacións económicas que palíen os amarres e paros que se produzan, así como aplicar o IVE superreducido de 4% a produtos do mar para fomentar o consumo”. Ademais, a organización nacionalista urxe “paralizar as reformas europeas e estatais postas en marcha para a eliminación das bonificacións ao combustíbel pesqueiro”.
Rego fixo saber que “a situación actual é insostíbel e as perdas económicas, laborais e sociais que poden implicar, incalculábeis”. E engadiu: “Hai que estabelecer unha rebaixa da imposición sobre os hidrocarburos, cando menos até que a inflación non se estabilice, que permita o mantemento da actividade pesqueira, así como aprobar axudas temporais ao sector pesqueiro afectado polo incremento dos custos de produción, a través das axudas de minimis, co obxecto de asegurar a viabilidade da actividade”.
Así mesmo, Rego demanda paralizar as reformas europeas e estatais en marcha que pretenden eliminar as bonificacións ao combustíbel pesqueiro e “implantar medidas urxentes de compensación económica que palíen os amarres e paros que se produzan como consecuencia da situación de altos custos actuais”.
Ademais recorda que é necesario aplicar o IVE de tipo superreducido de 4% aos produtos do mar- en lugar de 10% actual- por “tratarse de bens de primeira necesidade e por ser o seu consumo fundamental para manter a saúde da cidadanía, co que se aseguraría que se manteñan as vendas e unha alimentación de calidade a un prezo asequível”. Esta medida, dixo, conta co apoio da OMS e a Resolución do Parlamento Europeo, do 20 de outubro de 2021, sobre unha Estratexia “da Granxa á Mesa” para un sistema alimentario xusto, saudábel e respectuoso co medio ambiente que recomenda estabelecer un tipo nulo de IVE para os alimentos saudábeis e sostíbeis.
—
