O Concello de Ribeira informa da licitación dos traballos dirixidos a renovar a pavimentación e á dotación dos servizos municipais de pluviais e saneamento nas rúas Chaprado e Ceboleira, ambas localizadas na parroquias de Corrubedo.
O Concello sinala que “a día de hoxe a rúa Chaprado ten un pavimento de aglomerado asfáltico e non ten servizos de saneamento nin rede de pluviais, en tanto que a rúa Ceboleira contén un pavimento de formigón e tampouco posúe os servizos aludidos”.
Na rúa Chaprado vaise instalar un colector de PVC corrugado polo centro da calzada para a canalización de pluviais e un colector de PVC liso para o saneamento. Ademais, aplicarase un pavimento de formigón intercalado con franxas de lousas de granito.
No que respecta á rúa Ceboleira, disporase tamén un colector de PVC corrugado e outro de PVC liso, e no que se refire ao pavimento aplicarase unha solución de formigón.
O orzamento de licitación ascende a 92.687,79 euros, IVE incluído, e o prazo de execución son tres meses.
A actuación está enmarcada no POS+201 e o prazo de presentación de ofertas conclúe o 6 de abril á medianoite a través do Sistema de Licitación Electrónica da Xunta de Galicia.
