A Asociación Ambar das persoas con diversidade funcional de Ribeira recibía hoxe nas súas instalacións a Javier Pérez, xerente da empresa de conservas Nosa Arousa S.L. Nesta visita, Javier Pérez falou da súa traxectoria persoal, contoulles como se formou Nosa Arousa, o seu xeito de traballar, achegoulles suxestións e as nocións básicas para levar a cabo con éxito o traballo.
Ao encontro asistiron os e as alumnas das formacións sobre industria alimentaria e comercio que Ambar esta impartindo nas súas instalacións, grazas ao financiamento da Fundación ONCE, no programa Uno a Uno do POEJ e POISES cofinanciados polo Fondo Social Europeo. Tamén estiveron presentes en representación de Ambar: Milagros Rey, presidenta de Ambar; Daniel Tojo, orientador laboral; Ángeles Sampedro, técnica de emprego; amais de Raquel Riveiro e Inés Abad, docentes das formacións.
Conservas Nosa Arousa é unha empresa comprometida co produto galego onde mestura tradición, materia prima e calidade. A súa produción baséase en edicións limitadas e entre os seus produtos salientan: os mexillóns, as xoubas, os berberechos e a ventresca de atún. Cómpre subliñar que no ano 2021, foi galardoado co Premio de Ouro na Cata Transfronteiriza. Conta con oficinas en Ribeira, elaborándose a conserva no Polígono da Pobra do Caramiñal.
