Incendiaria leva o espectáculo “A lúa vai encuberta”, de Manuel María, ao Auditorio de Rianxo

O Auditorio de Rianxo vai acoller o 18 de marzo a representación da obra teatral A lúa vai encuberta, de Manuel María, unha coprodución de Incendiara, A Quinta do Cuadrante, Casa Museo Manuel María, CDG e MITFC, co patrocinio das Deputacións de Ourense, A Coruña e Lugo. Será a parir das 21.00 horas na Sala Arcos Moldes do Auditorio. A lúa vai encuberta é a obra gañadora do segundo Certame Manuel María de Proxectos Teatrais.

Público recomendado: persoas maiores de 13 anos.

Duración: 75 minutos.

A entrada é de balde, pode facerse a reserva na web municipal.​​​​​​​

A lúa vai encuberta é, en palabras das produtoras, un espectáculo arredor da realidade galega e “da loita incesante por conformar unha identidade propia, confrontándonos co noso pasado recente e as súas contradicións, desvelando un discurso que hoxe en día está sendo, senón ocultado, silenciado e que explica as razóns de por que hoxe en día o noso país ten os trazos políticos, sociais e económicos que o caracterizan”.

O espectáculo está dirixido por Tito Asorey, con Vanesa Sotelo na dramaturxia, e conta cun elenco formado por Davide González, Melania Cruz, Tito Asorey e Vanesa Sotelo.