A plataforma Somos Rianxo, fronte común dos negocios locais da hostalería e o comercio, entregou finalmente o premio do certame Namórate de Rianxo, de cuxa resolución informamos os días pasados dende O Barbanza, destacando que o certame culminaba co sorteo dun escaparate completo, formado por produtos cedidos por numerosos negocios de Rianxo (ceas, máquinas fitness, roupa, produtos para o fogar, vales de compra, etc) e con sede na rúa de Abaixo.
A asociación, que deu as grazas á veciñanza e ao tecido comercial de Rianxo pola súa implicación nunha iniciativa que tiña por obxectivo revitalizar a economía local e premiar a fidelidade da xente polos negocios locais, entregou o premio na noite deste 8 de marzo. O premio, un único galardón colectivo, foi compartido (e recollido) por Tamara Sobradelo Nine, Carla Ordoñez Hermo, Miriam Rodriguez Collazo, Eva Raño Alcalde e Tamara Iglesias Carou.
