O Concello de Ribeira fixo balance dos seus traballos recentes para a reforma e mantemento das súas instalacións deportivas. En concreto, emprendeu labores de reparación en cinco infraestruturas deportivas de titularidade municipal situadas en catro parroquias: Aguiño, Carreiro, Oleiros e Ribeira.
Así, no que se refire ao Campo de Fútbol da Tasca, situado na parroquia de Aguiño, substituíronse as portas e acondicionouse o depósito de auga: traballo este último desenvolvido por usuarios do módulo de carpintería da UAD, ao igual que do pintado da madeira exterior dos vestiarios deste campo.
Por outro lado, a brigada de obras actuou no Campo Municipal da Trinidade, en San Martiño de Oleiros, procedendo ao asfaltado exterior en torno ao campo de herba artificial. Na instalación tamén se colocaron postes perimetrais.
Polo que respecta á pista deportiva ao aire libre do Touro, en Santa Uxía de Ribeira, arranxáronse as canastras e porterías e nos próximos días substituiranse as redes en mal estado. E no que se refire ao Centro de Raqueta de Coroso, reparouse a pista de squash.
Por último, o Concello informou de que na Piscina Municipal María Vilas da Fieiteira, complexo localizado dentro da parroquia de Carreira, estase a encintar e arranxar a zona de jacuzzi para proceder nas próximas semanas á súa reapertura.
