David Chipperfield visitou con Luis Oujo a reforma portuaria de Porto do Son

Os días pasados o prestixioso arquitecto inglés afincado en Corrubedo David Chipperfield, impulsor da Fundación RIA (entidade envorcada en reivindicar os formatos arquitectónicos, urbanísticos, sociais, económicos e culturais da tradición secular da nosa comarca), visitou Porto do Son para comprobar en detalle o resultado dos traballos para renovar a fachada marítima da vila, un proxecto que foi concibido para humanizar a contorna portuaria e “devolver” o acceso ao mar á cidadanía e aos visitantes. Na súa visita estivo acompañado polo alcalde, Luis Oujo, a tenente de alcalde, María Maneiro, e polo arquitecto co-redactor do proxecto e director de obra, Marcial Rodriguez.

Chipperfield salientou positivamente o resultado final da iniciativa e destacou os seus valores de “coherencia e calidade”, poñendo o foco nos espazos habilitados para o desfrute das persoas, que pasan a ser a prioridade na contorna portuaria e marítima de Porto do Son. Amais, dixo, que a renovación da fachada marítima de Porto do Son é “un exemplo a seguir” que demostra que “é posíbel, coa implicación política e o esforzo de todos, facer realidade intervencións no espazo público sensatas e de elevada calidade”.

Luis Oujo, pola súa banda, mostrou o seu agradecemento a Chipperfield e ao seu interese polos traballo realizados na vila.