Este mércores 9 de marzo o Concello de Noia organiza unha concentración en apoio do pobo ucraíno e como mostra colectiva de repulsa fronte á invasión rusa e o asasinato sistemático de civís que está a perpetrar o exército de Vladimir Putin. O acto está previsto para as 12.00 horas diante da Casa do Concello. Dende o Goberno local fan un chamamento á cidadanía a participar nesta mostra colectiva de solidariedade co pobo ucraíno.
Campaña solidaria
A maiores, lembrar que o salón de plenos do Consistorio acolleu este luns 7 a presentación da campaña Solidariedade con Ucraína. No acto estiveron presentes o alcalde, Santiago Freire, a concelleira de Servizos Sociais, Marisol Villar, o párroco José Ortoño e o presidente de Cáritas Noia, Juan Carlos Pérez. Trátase, segundo dixeron, dunha actividade para canalizar e materializar en axuda material o espírito solidario da veciñanza de Noia.
Segundo fixeron saber, as doazóns pódense realizar no local de Cáritas de Noia (Malecón de Gasset 16) de luns a venres de 10:00h a 13:00h e de 17:00h a 19:00; os sábados e domingos só en horario de mañá de 10:00h a 13:00h. No cartel que acompaña a iniciativa e que incluímos nesta mesma información poden consultarse os produtos e equipamentos de meirande urxencia para seren levados a Ucraína.
