A sala de exposicións do Auditorio de Rianxo vai acoller entre o 4 de marzo e o 3 de abril unha exposición de Che Tembra, a mostra A metade do ceo, que recolle pezas en ferro do artista rianxeiro tamén coñecido como José Andrés Tembra Redondo (Taragoña, 1955).
O acto de apertura terá lugar o venres 04 de marzo ás 19.00 horas e ademais do autor da exposición participará o Grupo de Teatro Airiños, o grupo Barahúnda, a Asociación Cultural Barbantia, a Comisión para a Recuperación da Memoria Histórica do Barbanza e o Concello de Rianxo.
O artista
Che Tembra faise chamar a si mesmo “ferreiro escultor de refugallos”. É un artista de Taragoña, onde tamén ten o seu obradoiro e a súa forxa. A súa obra, tal e como el mesmo destaca, ten un forte compromiso coa esencia da nosa terra, coa defensa das liberdades e coa loita contra as inxustizas (ten protagonizado exposicións a prol da memoria histórica e da igualdade das mulleres).
