Porto do Son celebrou este 8 de marzo, Día Internacional da Muller, con varias actividades complementarias baixo un obxectivo común: facer fronte común a prol da igualdade e loitar pola plena equiparación de dereitos e oportunidades. Baixo o lema Igualdade real, un camiño por percorrer, celebrouse un obradoiro de sensibilización co alumnado de primeiro da ESO do IES de Porto do Son, actividade que veu complementada cunha Marcha pola Igualdade que discorreu polas rúas da vila e por unha chea de establecementos comerciais que se adheriron ás reivindicacións feitas pola rapazada. Segundo fixo saber o Concello e o profesorado e o alumnado que participaron nestas accións, “no Día da Muller reivindicamos unha sociedade máis xusta, onde mulleres e homes gocen dunha igualdade real”. Foi, engadiron, “unha xornada para reflexionar sobre a realidade e sensibilizar sobre o que nos queda por facer para chegar a ser unha sociedade feminista”.
Amais do obradoiro e a marcha polas rúas da vila, o programa de actividades do 8M en Porto do Son inclúe, baixo o epígrafe Na casa tod@s iguais, unha Xincana de co-responsabilidade co alumnado de Educación Infantil e de Primaria dos centros educativos de Seráns, Lapido, Xuño, Caamaño, Queiruga, Baroña, Nebra e Portosín. A xincana ten o obxectivo de traballar colectivamente pola igualdade e o traballo en equipo, amais de derrubar estereotipos e prexuízos negativos para as mulleres relacionados cos traballos empresariais e domésticos.
