A Policía Nacional de Ribeira detén a dúas persoas por senllos delitos de lesións

Axentes da Policía Nacional adscritos á Comisaría de Ribeira, procederon á detención de dous homes na localidade como presuntos autores de senllos delitos de lesións. Os feitos tiveron lugar as dúas últimas fins de semana, durante a madrugada, na zona de lecer nocturno de Ribeira.

No primeiro caso, no exterior dun establecemento de hostalaría, tras manter unha discusión, unha moza foi agredida por un home novo que lle golpeou cun vaso na cara, producíndolle diversas lesións consistentes en cortes na cara e no pescozo, polos que recibiu varios puntos de sutura ,tras ser trasladada por unha ambulancia ao Hospital do Barbanza.

No outro suceso, un mozo foi agredido por outro, así mesmo fronte a outro establecemento hostaleiro, quen lle propinou varias puñadas na cara, causándolle lesións na fronte e nunha orella, polas que tamén recibiu varios puntos de sutura tras ser asistido no Hospital do Barbanza.

En ambos os casos, tras ser identificados, foron detidos por senllos delitos de lesións.

Tras tramitarse as correspondentes dilixencias policiais, os detidos foron postos a disposición do Xulgado de Instrución de Garda de Ribeira