A Marea Cidadá de Noia vén de reclamar iniciativas de urxencia para axudar ás familias que, co conxunto de adversidades da nova década (escalada de prezos da enerxía, crise do coronavirus e guerra en Ucraína) que se suman a realidades e fendas económico-sociais que xa viñan de antigo, non van poder contar con recursos suficientes para facer fronte aos gastos enerxéticos correntes.
A Marea lembra que no pleno de novembro chegouse a un acordo na Corporación municipal para frear a pobreza enerxética, pero que este acordo “foi ignorado ate hoxe polo Goberno”, denuncian, recoñecendo o seu asombro “ante a falta de reacción que está amosando o Goberno de Noia ante a subida desorbitada dos prezos da luz e do combustíbel”.
Segundo fan saber, “a nosa incredulidade aumenta se recordamos que o pasado mes de setembro alcanzouse un acordo no pleno da Corporación instando ao Goberno a levar a cabo distintas medidas contra a pobreza enerxética, as cales nunca se levaron a cabo pola inacción do Executivo”.
Dende a Marea sinalan que algunhas desas medidas “terían axudado a atravesar a actual situación con maior facilidade para moitas familias, como a creación dun servizo de información e asesoramento para a cidadanía ante os cortes eléctricos, así como para a tramitación do bono social para o consumo eléctrico doméstico, ou solicitar á Deputación da Coruña a creación dun fondo contra a pobreza enerxética”.
