O secretario xeral de Política Lingüística, Valentín García, e o presidente da Fundación Antonio Fraguas Fraguas, Justo Beramendi, presentaron este 3 de marzo en rolda de prensa a XII edición do Proxecto Didáctico Antonio Fraguas Fraguas. A iniciativa conta co apoio do dito departamento da Xunta e ten como obxectivo “poñer en valor o patrimonio lingüístico e cultural galegos desde o ensino primario e secundario”. A convocatoria, que se retoma logo da pausa motivada pola pandemia, porá o foco en “estimular a investigación e o coñecemento da lingua e do patrimonio de Galicia”. As bases completas, así como o proceso de participación, poderán consultarse no Portal da Lingua Galega.
O secretario xeral de Política Lingüística explicou tamén “que esta é unha vía máis de achegamento da infancia e a rapazada á lingua galega, un espazo máis en que promovemos o seu uso entre as novas xeracións”.
Na presentación, que acolleu o Museo do Pobo Galego, participaron tamén Francisco Fariña Busto, membro do Padroado da Fundación Antonio Fraguas Fraguas e Fuco Sanjiao, secretario desta.
Promoción da educación patrimonial
Promovido pola fundación homónima e organizado polo Museo do Pobo Galego, o Proxecto Didáctico Antonio Fraguas Fraguas, está encamiñado á realización de pescudas sobre patrimonio etnográfico, antropolóxico, lingüístico, xeográfico, histórico e artístico nos centros escolares galegos.
Establece dúas modalidades de participación, para ensino primario e para o secundario, dotada cada unha delas con 7.000 euros por gañador. A dotación do premio investirase na elaboración dos materias que reflictan o traballo realizado, presentados en lingua galega, que se materializarán durante o curso académico 2022/23 e que se presentarán nunha exposición en setembro de 2023.
Nos proxectos presentados terase en conta as accións que fomenten a educación en igualdade ou o coñecemento do patrimonio material e inmaterial relacionado cos camiños de Santiago.
No proxecto poderán participar, ata o vindeiro 20 de maio, os centros docentes sostidos con fondos públicos que impartan ensinanzas de Primaria, ESO, ou Bacharelato.
