A Casa da Cultura de Dodro acolle este venres a presentación de “Cielo/Hielo”, de Anaïs Églises

A Casa da Cultura de Dodro acolle este venres 1 de abril a presentación do libro Cielo/Hielo de Anaïs Églises, primeira obra poética de Ana Isabel Iglesias, autora emerxente de Laíño. A cita será ás 20.00 horas.

Percorrido vital e literario

Ana Isabel entra en contacto coa poesía na infancia. Segundo conta ela mesma, a súa avoa recitaba versos e solicitaba a súa axuda para transcribilos e agasallalos, entre outras persoas, ao doutor que a coidaba das súas doenzas.

O interese pola lectura e a escrita vai medrando coa autora, quen se inicia na publicación nas redes sociais baixo o pseudónimo de Anaïs Églises. Na actualidade ten máis de 15 mil seguidores/as. Este apoio e admiración foron os que a animaron a procurar unha editorial que fixese realidade a obra que presenta. Coa confianza do seu público e da editorial Círculo Rojo conseguiu finalmente ver publicado Cielo/Hielo, libro que xa está á venda.

Trátase dunha obra poética escrita en castelán que contén tres partes: Cielo, na que a temática é o amor, Hielo na que o centro de interese é o desamor e Vagalumes, palabra galega coa que a autora se refire a aquelas persoas que son luz na súa vida.

Entre as influencias da súa escrita, Anaïs Églises, cita referentes como Pablo Neruda, Gustavo Adolfo Bécquer, Mario Benedetti e, especialmente, José Ángel Buesa, xunto con outros autores/as máis actuais, dos que salienta a Elvira Sastre, Marwan, Bebi, Loreto Sesma e Diego Ojeda.